壓力大性情變 名校母女「困獸鬥」

「以前得佢一個，想將最好俾佢，要入Band 1小學，要有Band 1中學入場券。」當梁蘊婷媽媽以為一切都是最好，女兒卻因壓力性情大變、不願回家，母女見面便是吵架，如同「困獸鬥」。

曾於九龍區名校就讀的蘊婷，媽媽小時侯也是名校生，認為入到名校「點都有用」、「請人都請Band 1學生，唔係Band 5」。然而，女兒自中二開始性情大變，不但成績追不上，更以活動為藉口逃避回家，「問佢食咗飯未，次次答食咗，然後入房困住自己。」二人吵鬧增加，「一開聲就溝通唔到！」

至中三，女兒成績撑不住，要留班，梁母曾向老師「求情」，豈料老師說：「唔可以，唔達標唔可以升，即使你留一年、兩年都如是！」老師更指：「若學生讀唔到書，通常他們會走，唔會留低！」

捱至中四學期完結，蘊婷已蒐集資料決定轉校，因要向母親介紹新校，二人的「和平對話」才得以展開；梁太說：「個女大咗，有自己思想，我亦不希望她不開心。」

轉校後壓力減，母女關係轉好，蘊婷不但主動分享校園生活，甚至協調父母關係；梁母亦欣賞女兒的轉變，笑言：「新校的校工也比名校的校工友善得多！」

當時年齡相差10歲、初升小學的妹妹卻因而「受惠」，梁母特別為她尋找可以開心學習，甚至入讀頻臨殺校的小學，即使成績達標可入精英班，梁母亦拒絕：「根本毋須贏在起跑綫，俾佢哋多作嘗試，至小五、小六子女自然會開竅，做到家長要求！」